Cando saco do conxelador o rico bacallau que traemos da feira de Portugal asáltame sempre a mesma pregunta: como o preparo? Temos uns lomos gordos, fermosos, e a min simplemente cocidos non me van moito, así que indaguei nos libros de cociña e fixen unha versión do “Bacallau lusitano” da Cociña de Larpeiros.
Bacallau con cebola allada
Apetecíame ademais algo de verduriña, e topei en Pontevedra unha coliflor de aquí, con toda a súa folla, fresquiña, así que me aventurei a unha variante da allada clásica.
Ingredientes (para 3 persoas):
- 600 grs de lomos de bacallau desalgado
- 2 cebolas grandes
- Fariña
- Aceite de oliva
- 1 cullerada grande de pementón moído doce
- 1 bo chorro de vinagre
- 1 coliflor
- Patacas (opcional)
- 3 ou 4 dentes de allo
Elaboración:
1.- Lavamos a folla da coliflor (á miña nai sempre lle gustou, e a min tamén) e partímola un pouco. Botámola en auga fervendo con sal e media cebola. Cando ferva 5 minutos, engadímoslle a flor partida en catro grandes anacos, e deixámola entre 12 e 15 minutos. (Eu non o fixen, pero pode engadirse pataca, ou fritila en vez da colilor).
Facemos unha cama coa coliflor
Escorrémolo e facemos unha cama coa verdura e a flor ao redor nunha fonte que poida ir ao forno.
2.- Secamos os lomos de bacallau desalgado e pasámolos por fariña. .
Secamos ben o bacallau
Nunha tixola con aceite ben quente, dourámolos por todos os cantos:
Fritimos o bacallau
Retirámolos sobre a cama de verdura, coa pel para abaixo, e reservamos.
Reservamos o bacallau
3.- No aceite de fritir o bacallau, sofritimos a cebola cortada en aros. Cando empece a abrandar, engadímoslle o allo laminado.
Sofritimos a cebola
Cando a cebola transparente, retiramos do lume. Podemos quitarlle algo de aceite. Engadimos o pementón e o vinagre, e remexemos ben.
Engadimos o pementón e o vinagre
4.- Cubrimos o bacallau e a coliflor coa mestura.
Cubrimos coa mestura
Metemos a fonte no forno a temperatura moderada entre 10 e 15 minutos (polo grosor do meu bacallau, non lle viñan mal 20 minutiños).
Resultado final
Pois eu probei hoxe a facelo. Pasou o exame na casa e pode repetirse mais veces. Tentei cociñalo 20 min no forno, pero se queimaba a cebola da allada e só botou 15. E como non sabía a temperatura, púxeno a 180º (ao PTV que invitei a comer gustoulle ver as follas da coliflor)
Pois alégrome de que gustase! Perdón, que esquecín o da temperatura. Nos Larpeiros din “temperatura moderada”, así que se cadra un pouco menos de 180º iría mellor. Vexo que atopaches a coliflor coa folla! Non é tan fácil…